Hvað er STEF?

STEF eru félagasamtök tón- og textahöfunda á Íslandi.

Hlutverk STEFs er að varðveita og efla höfundarétt á sviði tónlistar. STEF innheimtir gjöld fyrir notkun tónlistar sem flutt er opinberlega, fyrir hönd tónhöfunda. Viðskiptavinir STEFs eru t.d. útvarps- og sjónvarpsstöðvar, tónleikahaldarar, verslanir, veitingastaðir, hárgreiðslustofur og heilsuræktarstöðvar, sem og tónlistarveitur eins og Spotify og YouTube.

STEF hefur sérstaka viðurkenningu menningar- og viðskiptaráðuneytis til að innheimta fyrir alla tónhöfunda og lýtur eftirliti ráðuneytisins skv. lögum um sameiginlega umsýslu höfundaréttar nr. 88/2019.

STEF úthlutar því sem innheimt er til hlutaðeigandi rétthafa, innlendra sem erlendra. Úthlutun fer fram á grundvelli upplýsinga um hvaða verk hafa verið flutt, t.d. í útvarpi, og styðst við skráningu verka í gagnagrunnum, eftir því sem hægt er.

Í STEF voru skráðir um 9.000 rétthafar um áramót 2021/2022 og geymir gagnagrunnur STEFs um 100.000 verk.

STEFi er stýrt af fulltrúaráði og stjórn samtakanna. Almennir rétthafar kjósa fulltrúaráð á tveggja ára fresti og er það skipað 21 fulltrúa. Stjórn er skipuð sjö aðilum úr fulltrúaráði og er einnig kjörin á tveggja ára fresti.

Nánar má fræðast um tilgang og viðfangsefni STEFs í samþykktum samtakanna.

Menningarsjóður STEFs

STEF styrkir innlenda menningarstarfsemi á ýmsan hátt í gegnum Menningarsjóð STEFs. Ekki er þó hægt að sækja um styrki í þennan sjóð, heldur styrkir hann föst verkefni samkvæmt ákvörðun stjórnar STEFs hverju sinni. Framlög úr sjóðnum renna m.a. til rekstrar FTT (Félags tónskálda og textahöfunda) og TÍ (Tónskáldafélags Íslands), en einnig að hluta til reksturs „Samtóns“, sem eru sameiginleg hagsmunasamtök höfunda, flytjenda og framleiðenda, ÚTÓN (Útflutningssjóðs íslenskrar tónlistar) og ÍTV (Íslensku tónlistarverðlaunanna). Auk þess styður sjóðurinn við námskeiða- og viðburðahald fyrir meðlimi STEFs.